काठमाडौँ — नेपाल वैदेशिक रोजगार व्यवसायी संघले आन्दोलनका कार्यक्रम फिर्ता लिएको छ ।
युवा, श्रम तथा रोजगार मन्त्रालयसँग भएको छलफलपछि संघले आफ्ना सम्पूर्ण दबाबमूलक कार्यक्रम अन्त्य गर्ने प्रतिबद्धता जनाएको हो । मन्त्रालयले शुक्रबार जारी गरेको प्रेस विज्ञप्तिअनुसार श्रममन्त्री, मन्त्रालयका सचिव तथा नेपाल वैदेशिक रोजगार व्यवसायी संघका पदाधिकारीबीच भएको छलफलमा संघले अघि सारेका १५ बुँदे मागबारे विस्तृत छलफल भएको थियो ।
संघले साउन २२ देखि विभिन्न माग राख्दै आन्दोलन गर्दै आएको थियो भने भदौ ७ गतेदेखि गन्तव्य मुलुकमा श्रमिक पठाउनसमेत रोक्ने चेतावनी दिएको थियो ।
छलफलका क्रममा संघले उठाएका अधिकांश विषय वैदेशिक रोजगार ऐन तथा नियमावली संशोधनसँग सम्बन्धित नीतिगत विषय रहेको मन्त्रालयले जनाएको छ । मन्त्रालयले वैदेशिक रोजगार क्षेत्रलाई थप पारदर्शी, सुरक्षित र मर्यादित बनाउने उद्देश्यसहित ऐन तथा नियमावली संशोधनको प्रक्रिया यथाशीघ्र टुंग्याउन अधिकतम प्रयास गर्ने प्रतिबद्धता जनाएको छ ।
त्यस्तै, व्यवसायीहरूले कानुनबमोजिम थप प्रमाण र कागजातसहित आफ्ना समस्या वैदेशिक रोजगार विभागमा पेस गरेमा विभागबाट आवश्यक प्रशासनिक सहजीकरण गरिने र त्यहाँबाट समाधान नभए मन्त्रालयमा पुनरावेदन दिन सकिने व्यवस्था रहेको विषयमा पनि छलफल भएको मन्त्रालयले जनाएको छ ।
मन्त्रालयसँगको सहमतिपछि संघले आन्दोलनका सबै कार्यक्रम आजैदेखि अन्त्य गर्ने प्रतिबद्धता व्यक्त गरेको विज्ञप्तिमा उल्लेख छ । यससँगै वैदेशिक रोजगारमा जाने तयारीमा रहेका श्रमिक प्रभावित हुने सम्भावना तत्कालका लागि टरेको छ ।
संघले वैदेशिक रोजगार व्यवसाय सञ्चालनसँग सम्बन्धित नीतिगत तथा प्रशासनिक जटिलता समाधान गर्न माग गर्दै आन्दोलनका कार्यक्रम सार्वजनिक गरेको थियो । आन्दोलनकै क्रममा श्रमिक पठाउने प्रक्रिया रोक्ने चेतावनी दिएपछि वैदेशिक रोजगार क्षेत्र र श्रमिकबीच अन्योल बढेको थियो ।